უძრავი ქონების სწრაფად მზარდი ფასების ფონზე, ბევრი ინვესტორი სწორედ ამ ინდუსტრიისკენ მიმართავს ყურადღებას — დიდი თუ მცირე ინვესტორები ფიქრობენ, რომ მსგავსი ტიპის აქტივების შეძენა დიდ წარმატებას მოუტანთ. თანაც, როგორც დარგის ექსპერტები ირწმუნებიან, უძრავ ქონებაში ინვესტირებას შეუძლია, თაობები უზრუნველყოს ფინანსურად — ვინაიდან ეკონომიკის განვითარებასთან ერთად, უძრავ ქონებაზე მოთხოვნა იზრდება და ფასები მუდმივად მყარდება, კრიზისული პერიოდების მოკლევადიანი ეფექტი კი ყველაზე ნაკლებად აისახება მასზე.

თუმცა ვიდრე მოგება/წაგების საკითხით დავინტერესდებით, უმჯობესია განვიხილოთ, ზოგადად რას გულისხმობს უძრავ ქონებაში ინვესტირება და რა მიმართულებით შეგვიძლია მისი განხორციელება.

რა არის „საინვესტიციო უძრავი ქონება“?

საინვესტიციო უძრავი ქონება არის უძრავი ქონება, რომელიც გამოიმუშავებს შემოსავალს ან სხვაგვარად არის განკუთვნილი საინვესტიციო მიზნებისთვის, ნაცვლად პირველადი საცხოვრებლის ფუნქციის შესრულებისა. ინვესტორებისთვის ჩვეული მოვლენაა სხვადასხვა სახის უძრავი ქონების ფლობა, რომელთაგან ერთი ძირითად საცხოვრებელს წარმოადგენს, ხოლო დანარჩენი გაქირავების შედეგად შემოსავლის მისაღებად და ფასის ზრდის შემდეგ გაყიდვით მოგების გამოსამუშავებლად გამოიყენება. უფრო კონკრეტულად, ამგვარი ინვესტიცია უძრავი ქონების ყიდვის, გაყიდვის, მართვის, დაქირავება/გაქირავებისა და გარემონტების გზით მუშაობს — ნებისმიერ შემთხვევაში მთავარი სარგებელი შემოსავლის მიღებას უკავშირდება.

უძრავ ქონებაში ინვესტირების ტიპები

როგორც უკვე აღვნიშნეთ, უძრავ ქონებაში ინვესტიციას ინვესტორებისთვის დიდი ფინანსური სარგებელი მოაქვს. საინვესტიციო ქონების ფლობამ შეიძლება ხელი შეუწყოს შემოსავლის ზრდას და საინვესტიციო პორტფელის დივერსიფიკაციას. და, მიუხედავად იმისა, რომ უძრავი ქონების ბაზარზე მრავალი მიმართულებით შეიძლება ინვესტიციის ჩადება, უპირველეს ყოვლისა, ქონების უმეტესობა ორ კლასიფიკაციად იყოფა: საცხოვრებელი და კომერციული.

უფრო დეტალურად რომ განვიხილოთ, პირველ მათგანში იგულისხმება სახლები, ბინები და ზოგადად ნებისმიერი საცხოვრებელი კომპლექსი თუ ფართი. ბოლო პერიოდში კი ძალიან დიდი პოპულარობით სარგებლობს აპარტამენტების შეძენა, რადგან მის მფლობელს სასტუმროსთვის საჭირო ყველა სერვისის გამოყენების საშუალება ეძლევა — მაღალგანვითარებული ინფრასტრუქტურის, მომსახურების, კონსიერჟის, რესეფშენისა და ა. შ. სურვილის შემთხვევაში კი აპარტამენტის გაქირავება შესაძლებელია სასტუმროს მმართველობის დახმარებით.

ამასთან, აუცილებელი არაა, ინვესტორმა მშენებარე ან უკვე აშენებულ საცხოვრებელში ჩადოს ინვესტიცია — სანაცვლოდ, შესაძლებელია თავად ააშენოს ან იყიდოს კომპლექსი, რომელსაც შემდეგ ჰოსტელის სახით გამოიყენებს, დღიურად გააქირავებს. ესეც ერთ-ერთი ეფექტური გზაა მუდმივი შემოსავლის მისაღებად, უბრალოდ მეტ ძალისხმევას და ყურადღებას მოითხოვს, ვინაიდან თავად იქნება ინვესტორი ყველაფერზე პასუხისმგებელი.

რაც შეეხება კომერციულს, აქ კიდევ უფრო მეტი მრავალფეროვნებაა: ის შეიძლება მოიცავდეს საცალო მაღაზიებს, საოფისე შენონებს ან საწყობებს. წინა ვარიანტისგან განსხვავებით, ამ შემთხვევაში ინვესტორი ძირითადად პასიურ მდგომარეობაშია — შემოსავალს იღებს ფართისგან, რომელსაც სხვები იყენებენ. ასევე, საჭიროების მიხედვით შესაძლებელია, კონკრეტული ფართით თავად ინვესტორმა დაიწყოს სარგებლობა, რაც მეტი ვარიაციის არეალს ხსნის.

აპრობირებული მეთოდია გასარემონტებელი ფართის შესყიდვა, მისი გარემონტება და შემდეგ უფრო მაღალ ფასში გაყიდვა ან გაქირავება/გაგირავება.

მიზნები კი, რა თქმა უნდა, კონკრეტული ინვესტორების ფასეულობების თუ შეხედულებებისა და სურვილების მიხედვით განსხვავდება — ზოგიერთ მათგანს უნდა, ამ გზით საინვესტიციო პორტფელის დივერსიფიკაციის ხარისხი გაზარდოს; ნაწილი კი ამჯობინებს, ფასიანი ქაღალდების ნაცვლად (როგორიცაა აქციები და ობლიგაციები), ფიზიკურ აქტივებში ჩადოს ინვესტიცია.

გარდა ამისა, აღსანიშნავია, რომ ფიზიკური ქონების ფლობა უძრავი ქონებით ფულის გამომუშავების ერთადერთ გზას არ წარმოადგენს. არსებობს კიდევ ერთი ვარიანტი — უძრავი ქონების საინვესტიციო ტრასტში (REIT) ინვესტირება — ეს არის კომპანია, რომელიც ფლობს და ჩვეულებრივ მართავს შემოსავლის მომტან უძრავ ქონებას ან მასთან დაკავშირებულ აქტივებს. ამ უკანასკნელის ერთ-ერთი ყველაზე დიდი უპირატესობა დივიდენდური სარგებლის მიღებაა. აშშ-ში კანონით REIT-ებს მოეთხოვებათ, თავიანთი შემოსავლის 90% დივიდენდების სახით გასცენ, რათა საგადასახადო შეღავათებით სარგებლობა შეძლონ. ინვესტორს შეუძლია, ამ დივიდენდური შემოსავლის რეინვესტირებას მიმართოს, რაც დროთა განმავლობაში მის სარგებელს მნიშვნელოვნად გაზრდის.

ამ ყველაფრის გათვალისწინებით აშკარაა, რომ უძრავ ქონებაში ინვესტირება ბევრ მნიშვნელოვან სარგებელს, მრავალფეროვან შესაძლებლობებსა და არჩევანს აერთიანებს. ეს არის სფერო, სადაც ინვესტორები მაქსიმალურად საკუთარ თავზე მორგებულ გადაწყვეტილებებს იღებენ და მარტივად აკონტროლებენ, რა მიმართულებით სურთ არსებული კაპიტალის განვითარება.

რუბრიკა „ინვესტიციების“ წარმდგენია „ალიანს ჯგუფი“ — ინფორმაციას მათი საინვესტიციო პროექტებისა და დამკვიდრებული სტანდარტების შესახებ დეველოპერული კომპანიის ოფიციალურ ვებგვერდზე გაეცნობით.

ავტორი: ქეთია ბელქანია